Ti turar i Time 2025: Tur 9, Brusaknuten Jan Oskar Haugen

Brusaknuten

Fottur, 8,0 km, rundløype, middels
Total stigning 288 m

Ti turar i Time 2025: Tur 9, Brusaknuten, startskilt Jan Oskar Haugen

Tilkomst

Du kan parkera på parkeringsplassen ved fylkesveg 504 (Buevegen). Det står skilta til turparkering rett etter at du har passert Husavatnet, som er det første vatnet på høgre sida av vegen etter den skarpe svingen. QR-koden for å lasta ned løypa finn du på ein stolpe rett ved parkeringsskiltet ved driftsbygningen.

Turinformasjon

Turen startar på gardsveg opp til Kartavatnet, der vegen deler seg. Følg skiltet mot Brusaknuten, då går vegen langs vatnet og vidare til skogen og bekken som må kryssast, før løypa tar deg bratt oppover Bruaberget. Deretter går stien over ein gjerdeklyvar på sørsida av Toraknuten før den siste oppstigninga til sjølve Brusaknuten begynner.

Når du er oppe finn du QR-koden for registrering av turen på stolpen som markerer toppunktet på fjellet, 432 moh. Dette er det høgaste punktet på Jæren.

Ti turar i Time 2025: Tur 9, Brusaknuten, målskilt Jan Oskar Haugen

Vel framme fortset du på merka sti og driftsveg i retning mot Ognedalsstølen. Før Ognedalsstølen tek du av ved skilting og raude merkepålar mot Karten og Mellomstrand, deretter går du på gardsvegen tilbake til parkeringsplassen ved Husavatnet. Du kan óg gå same vegen tilbake som du kom opp til toppen, men då går du glipp av ein Stolpejakt-stolpe ved Fjærakjødnå.

Turen kan elles kombinerast med ein avstikkar til Karten, 421 moh, der du har god utsikt frå toppen.

Me håper du får ein fin tur!

Stolpejakten

I år har me teke med det landsdekkande konseptet Stolpejakten i Ti turar i Time! Du kan lesa meir om det på denne sida her hos oss, eller på sidene til Stolpejakten, men kort fortalt er det eit lågterskel-tilbod for å få folk ut på tur. Last ned appen «Stolpejakten» til telefonen din, så kan du skanna QR-kodar på stolpane langs vegen og «samla» stolpar over heile landet.

På denne turen finn du til saman fire stolpar. Du finn dei lettast ved å søka opp kartet som heiter «Ti turar i Time» i Stolpejakt-appen, men dei står på følgande plassar: Ein stolpe ved driftsbygningen der turen startar, stikrysset der du kan ta avstikkaren til Karten, stolpen som markerer toppunktet på Brusaknuten, og skiltet ved Fjærakjødnå der du går mot Karten og Mellomstrand.

Påminningar

Her og der kan det vera husdyr på beite. Derfor legg me til fem små, men viktige påminningar for at alle skal ha glede av turtilbodet:

• Vis omsyn når du parkerer, slik at du ikkje blokkerer vegen for andre
• Respekter bandtvangen
• Lukk eventuelle grinder
• Ta avfallet med heim
• Følg kuvett-reglane viss du møter kyr når du er ute på tur