Kommunesektorens interesseorganisasjons KS ser på denne saka som så prinsipielt viktig at dei ber Time kommune anka, mot at KS tek på seg arbeidet og kostnader med saka. Det vil seia at det er KS sine eigne advokatar som nå vil overta saka, og at eventuelle saksomkostningar vil bli dekka av KS. 

 - KS ønskjer å føra saka for Time kommune, men også vera partshjelpar då avgjerda kan ha store konsekvensar for kommunesektoren og for tilsette under 60 år, seier arbeidslivsdirektør Tor Arne Gangsø i KS. 

 - Arbeidstakar over 60 år har rett på ei ekstra ferieveke som dei sjølv fastset ved å gi arbeidsgivar 14 dagars varsel. Dette er ein rett arbeidstakar over 60 år har, og KS har ingen hensikt om å rokka ved denne retten. Saka gjeld berre retten til å få ekstra fri for turnusarbeidarar over 60 år ved å legga ferien i tilknyting til helg- og høgtidsperiodane. Dersom dommen blir ståande vil arbeidstakarar under 60 år, til dømes småbarnsforeldre, måtte påleggast å jobba på helg- og høgtidsdagar som dei i lang tid i førevegen har fått innvilga fri på og planlagt avvikling av, seier Gangsø. 

Fristen for å anka Sør-Rogaland tingrett sin dom var 20. mars. Saka blir nå anka til Gulating lagmannsrett. 

 - Time kommune er ueinig i tingretten si avgjersle, og har grundig vurdert spørsmålet om anke. KS har i dialog med kommunen gitt uttrykk for at dette er ei prinsipielt viktig sak for kommunesektoren, noko Time stillar seg bak. At KS så tilbydde seg å ta arbeidet og alle kostnadar ved ein anke, var avgjerande for at me til slutt landa på å ta saka vidare, seiar kommunedirektør Trygve Apeland, og fortset: 

 - I denne saka har det kome fram at Sykepleierforbundet og KS har ulike syn på uttak av den ekstra ferieveka, og har rådgitt sine medlemmar ulikt. Då er det fornuftig med ei avklaring i rettssystemet. Det er viktig for meg å understreka at frå arbeidsgivar si side opplever me ein god dialog og samarbeid med den tilsette, men me er ueinige om dette konkrete spørsmålet.